Já, Daninn er sjálfum sér líkur!

ESB báknið er engu líkt! Nú vill danska vinstri konan og stórbóndinn Mariann sem er landbúnaðarráðherra ESB, banna sykur í vínframleiðslu, enda ekki hagsmunamál fyrir hana sjálfa, ræktar líklega ekki vín á neinum af þremur stórbýlum sínum í Danmörku, en vill að sjálfsögðu hafa vit fyrir öðrum um það hvað gera megi og hvað ekki!!  Lýsandi dæmi um niðurrifsöflin í ESB...

Banna sykur í vínframleiðslu

Borgarstjórnarfundur.

Nú stendur yfir borgarstjórnarfundur í Ráðhúsi Reykjavíkur þegar þetta er skrifað. Athyglisvert er hve lítið er fjallað um þennan fund á netsíðum blaðanna þ.e. mbl eða vísi t.d.  Hinn nýi meirihluti sem nú er tekinn við er ekkert enn á því að setja fram stefnuskrá sína eða málefnasamning fyrir næstu misseri.  Lítið er fjallað um fjárhagsáætlunina á þessum fundi, þótt seinni umræða eigi að vera til umræðu samkv. dagskrá fundar.  Þó reyna sjálfstæðismenn með veikum hætti að koma umræðu um þessi mál á dagskrá!.  Það eina sem rætt er um er hvernig megi ráðstafa peningum borgarinnar í ný verkefni á næstu misserum eins og t.d. nýtt embætti umboðsmanns borgarinnar (einhverskonar leiðsögumann fyrir hinn almenna borgara).  Nú dugar því ekki lengur hið hjálpsama símaver borgarinnar, heldur er nýju embætti bætt í báknið!.  Svo er það stóra málið, SKATTURINN, hann verður ekki lækkaður á fasteignaeigendur næstu misserin, sjálfstæðismenn höfðu stefnt á lækkun hans. Hinn nýji ósamstæði meirihluti ætlar að halda áfram að þenja út BÁKNIÐ í kerfinu, með tilheyrandi kostnaði og svo ætla menn að grenja út úr ríkinu meiri hlutdeild í skattinum vegna þess að hinni "velstæðu borg" hefur tekist að spila út sínum bestu spilum í tóma óráðsíu síðasta áratug.  Og það á mesta uppgangstíma landsmanna fyrr og siðar.  Ríkinu hefur tekist að hagræða síðasta áratuginn en ekki BORGINNI!!  Það er skiljanlegt að sum lítil sveitarfélög þurfi á hjálp að halda, en það að BORGIN þurfi að skríða til Ríkisins og biðja um ölmusu er "skandall".  Þetta lýsir einfaldlega hvernig hinn nýji R-listi ætlar að starfa: jú, með sama hætti og áður.  Borgarbúar fá að blæða út áfram,  hægt og rólega.  Enn og aftur verður maður að undrast hve lítinn áhuga fjölmiðlar hafa á málefnum borgarinnar og hafa lítinn áhuga á þeim "litlu" umræðum sem eiga sér stað um þá milljarða sem flæða út úr sjóðum borgarinnar.  Þetta eru peningar okkar allra borgarbúa en ekki bara borgarfulltrúa Reykjavíkur.  Það þarf á vökulum augum fjölmiðlamanna að halda til að ekki fari illa í borginni á næstu misserum og ný hneyksli á við "rækjueldi, línu-net" eða sitthvað annað eigi sér stað enn og aftur.  Nú reynir á borgina, þegar harðnar á dalnum í peningamálum landsmanna.  Nú þýðir ekki að "fela sig" á bak við uppsveiflur í gengi krónunnar eða hækkun verðbréfa og fl. Sá tími er líðin að sinni!!

GOLF!

Það var gaman að heyra að Íslendingurinn Birgir Leifur skyldi ná inn á Evrópsku golfmótaröðina í dag.  Það er ekki oft sem maður heyrir um góðan árangur íslendinga í íþróttum á erlendri grundu.  Þetta þýðir nátturulega að við fáum meira að heyra af golfi næsta árið, ekki það að ég sé áhugamaður um golf eða eitthvað slíkt (nánast aldrei slegið högg með kylfu, þ.e. golfkylfu).  En það er svolítið sérstakt með þetta ákv. afrek, það að maður gat séð að þarna væri atvinnumaður á ferð, það sást vel þegar tekið var viðtal við hann í sjónvarpi, maður gat séð að þar á ferð væri mjög yfirvegaður einstaklingur sem léti ekkert trufla sig í að ná markmiði sínu.  Það er ekki oft sem maður sér slíkar persónur í íþróttum frá þessu landi okkar.  Þessi einstaklingur hélt haus við að ná sínum árangri, sem er ekki sést nóg af hér á landi í íþróttum almennt.  Allt of oft höfum átt einstaklinga í íþróttum (einstaklings sem og hópíþróttum) sem hafa gugnað á lokasprettinum og "sprungið" með einum eða öðrum hætti.  Meiðsl, þrek, vanmat, ofmat o.s.frv. hafa verið okkar "mottó" í gegnum tíðina, þekkjum það með t.d. frjálsar íþróttir, landsliðið í fótbolta, sundið, skíðin og fl.  En þetta hlýtur að verða til þess að lyfta okkur aftur eitthvað upp og ætti að stytta  i skammdegisþunglyndinu hjá sumum.  Með von um betri tíð í íþróttum, þá óska ég þessum golfara til hamingju með að halda uppi heiðri þjóðarinnar í íþróttinni. 

Um ljósleiðara og heimreið!

Það er lofsvert að sjá frétt um það þegar menn taka sig til og framkvæma hluti sem aðrir eiga að gera, en gera ekki fyrr en eftir "dúk og disk".  Þannig var það með bóndann á Dæli í Fnjóskadal, hann beið ekki boðanna heldur rauk í hlutina og framkvæmdi sjálfur, þ.e. lagði ljósleiðara yfir Víkurskarðið, allt til að komast í háhraðasamband við umheiminn og losna við snjókomuna á sjónvarpskjánum, eins og hann orðaði það!.  Hann borgar a.m.k tvær milljónir fyrir þetta eitt að geta notið nútímaþæginda.  Þetta er nú kannski ekki mikill peningur, þegar það er haft í huga að flestir bændur eru með tugmilljónir króna dráttartæki og vinnuvélar á bæjum sínum og a.m.k  einn til tvo jeppa til taks.  En þetta mættu aðrir taka sér til fyrirmyndar, en ekki vera alltaf að treysta á að einstök fyrirtæki með stuðningi hins opinbera eða þá hið opinbera sjálft komi og bjargi hlutunum strax.  Þetta sýnir þó það að fólk í hinum dreifðu byggðum landsins er nú ekki alveg bjargarlaust með öllu.  Þetta sýnir líka að ef menn taka sig saman og ákv. að gera eitthvað líkt þessu eða þá eitthvað annað, þá er það hægt ef vilji er fyrir hendi!.  Einkaframtakið er alltaf snöggara til athafna en hið opinbera.  Það sama verður ekki sagt um framtak hins fyrrverandi pólitíkusar og núverandi athafnamanns og auðjöfurs, sem vildi slitlag á heimreið sína austur í sveitum!.  Hann taldi það sjálfsagt að sækja um að sveitarfélagið leggði slitlag nokkur hundruð metra fyrir sig að bæ sínum þar í sveit.  Þar sem sveitarfélagið var hvort sem er að vinna í þessum málum í næsta nágrenni.  En það er eins og með marga framsóknarmennina, að þeir reyna alltaf til hins ýtrasta að kreista sem mest úr opinberum sjóðum, allt sem hönd á festir, jafnvel löngu eftir að þeir eru búnir að yfirgefa hinn pólitíska vettvang og eru með fullar hendur fjár.  Það er hafsjór á milli þess framtaks sem bóndinn sýnir með framferði sínu og hins fyrrverandi pólitíkusar. 

 

Sunnudagshugvekjan!

Þá er enn einn Sunnudagurinn runnin af stað !  Og að sjálfsögðu lagði maður augu og  eyru við Sunnudagsmessu "SILFUR EGILS", enda má ekki missa af hinum sívinsæla boðskap sem þar er fram borinn á hverjum Sunnudegi yfir vetrartímann.  Í þættinum var m.a. rætt um umhverfismál, og benti Pétur Blöndal á þá hluti hvað varðar mengunina frá álverunum að betra væri nú að hafa álverin hér á landi en að láta t.d. Kínverjana framleiða ál með allri þeirri mengun sem því fylgdi þar í landi (þ.e. kol og olía).  Því þar væri rutt niður heilum fjöllunum til að framleiða þennan "mjöð" sem álið er.  Ef menn vilja hugsa hnattvætt hvað varðar að minnka mengun, þá er Ísland að sjálfsögðu besti staðurinn til framleiðslu þessara vara (hreinasta orkan).   Steingrímur J. var samur við sig eins og svo oft áður, á móti öllum virkjunarmálum en minnti þó á að auðvitað væri betra að nota hreina orku við vinnslu heldur en kol eða olíu (en ekki á Íslandi samt sem áður).  Hann vill bara sjá framl. orku þannig að hún nægi okkur Íslendingum og "BÚIÐ".  Sem sagt við leggjum ekkert til umheimsins nema það að halda orkunni bara fyrir okkur, og sýna umheiminum að við getum verið sjálfum okkur nóg.  Hann er stuðningsmaður "VINDMILLA" og annarra lífrænna orkugjafa.  Gaman væri nú reyndar að sjá Vindmillur á hverju landshorni hér, líklega setti hann sig ekkert upp á móti því, enda mjög umhverfisvænar, útlitsvænar osfrv.  Talað var um útrásina og þar minnti Steingrímur J. á að hagkerfið væri að sprínga af allri útrásinni og þennslunni ásamt öllum stóriðjuframkvæmdunum.  Hann veltir þó ekki fyrir sér hvernig ástandið væri ef ekkert af þessu hefði komist í framkvæmd, eins og örugglega hefði verið ósk hans.  Það er rétt að þennslan hefur verið mikil, en þá á þjóðin líklega að geta þolað einhvern afturkipp þegar að STOPPINU kemur í hagkerfinu, við eigum þó eitthvað inni sem við annars ættum ekki, ef ekkert hefði verið að gert hér í útrásinni og uppbyggingunni síðustu misserin! Pétur B. benti á að miklu minna þyrftu menn að hafa áhyggjur af útrásinni núna, heldur en  fyrir nokkrum árum síðan, því nú væru útrásarfyrirtækin búin að DREIFA áhættunni vítt og breitt um veröldina!  ÁHÆTTAN er því ekki eins mikil fyrir okkur eins og áður fyrr.  Að lokum þetta um hina "pólitísku léttlyndu valdaskessuna " eins og Guðni Ágústsson komst að orði, þá sagði hún að fullt traust væri innan ríkisstjórnarinnar í öllum málum.  Hún hefði engar áhyggjur að hlaupast undan merkjum í samstarfinu, svona rétt til að ná betur saman í samstarfinu við borgarstjórnarmeirihlutann.  Þá talaði hún um jafnréttislögin sem Jóhanna  Sig. fer fram með á þingi.  Hún telur að þetta mál nái framgangi á þingi, þó víst sé að þetta regluverk sem í vinnslu er sé margt skrítið á margan hátt, til að mynda það, að hægt sé fyrir hið opinbera að blanda sér í launadeilur innan fyrirtækja stórra sem smárra, þannig að ef einhver einstaklingur telur brotið á sér þá geti hann snúið sér til ríkisins og beðið um hjálp, í staðinn fyrir að sá einstaklingur sem brotið sé á (að hans eigin mati) geti farið og sótt sitt mál fyrir dómstólum.  Það hlýtur að vera áhyggjuefni ef Samfylkingin hefur það á stefnu sinni að efla Lögregluríkið með þeim hætti að koma á einhverskonar (BIG BROTHER) eftirlitskerfi.  Hvað kæmi þá næst...

Keflavíkurflugvöllur!

Jæja, þá eru þær að koma í ljós, afleiðingarnar af brotthvarfi hersins af Miðnesheiði!  Niðurskurður í eftirliti með viðhaldi flugbrauta og fleira.  Fækkað hefur verið í slökkviliði á vellinum og svo virðist sem sparnaður sé í gangi með að halda flugbrautum hreinum hvað varðar ísingu og fl.  Hér áður fyrr þegar herinn var til staðar þá sá hann um að halda vellinum í sem bestu ásigkomulagi allann sólarhringinn, og engu til sparað, svo komu íslendingar og tóku við þessum gríðarstóra "velli" og þóttu það lítið mál að sjá um þetta!  En svo virðist sem þetta sé of stór biti fyrir okkur hér á skerinu að sjá um þetta svo vel sé.  Öryggismál eru í ólagi, þ.e. fækkun í slökkviliðinu fræga eins og áður er nefnt, sem séð hefur um þessi mál í áratugi.  Flugvélar renna á flugbrautum, eitthvað sem ekki átti sér stað þar áður fyrr.  Það hlýtur að vera áhyggjuefni að fólk sem ferðast um völlinn geti ekki verið öruggt með öryggi sitt þegar það ferðast! Þetta minnir mig á máltækið gamla góða "Enginn veit hvað hann átt hefur fyrr en misst hefur" þá meina ég þetta með "herinn".  Við munum hér í gamla daga þegar slökkviliðið á vellinum var talið eitt það besta í heiminum og var fengið til að bjarga málum langt út fyrir "völlinn".  Nú er tíðin önnur. Sparnaður er lykilorðið hjá stjórnvöldum.  Persónulega er þetta ekki stórmál fyrir mig þar sem ég ferðast ekki um þennan völl á veturna, en ég spyr bara um blessaða stjórnmálamennina sem eru alltaf á þönum út um allt hvort þeim líði vel þegar þeir taka á loft eða lenda þarna í "nepjunni á miðnesheiði".  En hvað um það, lífið er nú einu sinni lotterí!!.    

Sala áfengis og tóbaks.

Á alþingi er frumvarp um sölu áfengis og tóbaks til umræðu.  Þetta frumvarp er ekki þar í fyrsta sinn til umræðu, en þó er augljóst að fylgið, við að þetta frumvarp nái samþykkt eykst með ári hverju.  Það eru heldur engin rök fyrir því að þetta frumvarp sé ekki samþykkt.  Fyrir nokkrum árum var samþykkt frumvarp um að bjórsala skyldi leyfð hér á landi.  Og  ekkert hefur komið fram um annað, en að þetta hafi fallið vel í "landann".  Svo vel, að drykkjumenningin hefur stórbatnað hér á landi.  En það má ekki blanda þessari umræðu við annan vanda í þjóðfélaginu og þá þann að önnur fíkniefni, miklu sterkari hafa verið þjóðinni til vandræða undanfarið. En það er allt önnur umræða!  Þetta með að leyfa sölu á bjór og léttvíni annarstaðar en í ríkinu getur ekki verið annað en hið besta mál, enda þegar komin reynsla á þetta óbeint, þar sem sumstaðar úti á landi er ríkið staðsett innan sumra verslana, en þó stúkuð sérstaklega af.  Við eigum alveg að geta treyst stærri verslunum og fyrirtækjum til að sinna þessu með ábyrgum hætti.  En eins og kemur fram í frumvarpi er ekki verið að tala um að litlir söluturnar eða söluvagnar og fl. eigi að fá leyfi til sölu á þessum varning.  Á alþingi hafa andstæðingar þessa frumvarps bent á að á síðustu árum hafi náðst mikill árangur í forvarnarstarfi varðandi áfengisneyslu og bent á að neyslan hafi minnkað hvað styrkleika varðar.  Þetta er akkúrat málið í hnotskurn, vð eigum að beina fólki meira í léttari vínin, en það gerist best með því að útiloka sterka áfengið frá almennri verslun.  Við verðum að horfa áfram fram á veginn, en ekki standa endalaust í sporum fortíðar og hugsa hve gott það hefur verið að hafa eitthvert "opinbert yfirvald" til að taka ákvarðanir um líf okkar hér á þessari eyju.