Forsetinn.

   Hvernig er það, nú þegar mótmælendur á Austurvelli eru loksins búnir að hræða líftóruna úr Samfylkingunni, er þá ekki tími kominn á Forsetann og krefjast afsagnar hans?  Hann var jú einn þeirra sem hrósaði útrásinni í hástert á sínum tíma og ber ekki minni ábyrgð en aðrir á öllu saman, hann hvatti útrásarvíkingana í hvívetna og var fyrsti maður að mæta á samkomur þeim til heiðurs.  Ætla hinir vösku félagar úr Harðarvinafélaginu ekki að mæta á Bessastaði og berja bumbur... maður spyr nú bara?

Björn: Forsetinn gekk á svig við hlutleysi sitt

Samfylkingin uppfyllir óskir mótmælenda.

  Hverjir fara með völdin?  Jú svo virðist sem völdin séu í höndum nokkurra þúsunda einstaklinga sem mæta á Austurvöll helgi eftir helgi til að krefjast afsagnar Ríkisstjórnar, og svo virðist sem Samfylking ætli að uppfylla óskir þessa fólks.  Svo virðist sem restin af þjóðinni muni ekkert fá að segja um málið. Restin af þjóðinni fylgist bara með, hinn þögli meirihluti þjóðar fær ekkert um þetta að segja?  Greinilega er hart barist um atkvæðin á vinstri væng stjórnmálanna.  Það hefur verið um það rætt að ef félög eins og Heimdallur Sjálfstæðisflokksins væri með samkomur af þessu tagi þar sem meðlimir eru um 5000. þá væri líklega umfjöllunin með öðrum hætti.  Líklega myndi Ríkisútvarpið allavega ekki vera á staðnum helgi eftir helgi til að flytja fréttir af málum.  Ef svo fer fram sem horfir, þá þurfum við varla að mæta á kjörstaði í framtíðinni, því ákvarðanir verða alla teknar á Austurvelli og af þeim sem láta mest í sér heyra og eiga stærstu pottana til að berja í. 

Upphaf á kosningabaráttunni

Erfiðir tímar framundan.

  Ljost er að erfiðir tímar eru framundan.  Forsætisráðherra talar um að ekkert megi fara úrskeiðis og halda þurfi dampi.  Það er jú erfitt að spá hvað skeður á næstunni, allir virðast vera fara yfirum sem eitthvað tjá sig um stjórnmál þessa dagana.  Og kannski er það vandinn sem framundan er, þ.e. menn rjúka til og koma fram með skyndilausnir sem kannski geta gert illt verra þegar til lengri tíma er litið.  Athyglisvert að heyra í öllum stjórnmálafræðingunum sem nú hoppa fram enn eina ferðina og skýra ástandið frá sínum sjónarhóli, almennt telja þeir að stjórninni sé vart hugað líf og segja í raun að hún sé dauðadæmd.  Heldur finnst manni sem þessir fræðingar tali út í vindinn þessa dagana, en reyndar verður að segja það þeim til varnar, að þeir lifa jú á því að tjá sig um þessi mál almennt, þótt þeir tali nú ætíð á neikvæðu nótunum oftast nær.

Geir: Má ekki missa dampinn

Og hver tekur við?

   Nú er spurningin: hver tekur við embættinu hjá Samfylkingunni, hver ætlar að fórna sér næst í þetta sjóðheita ráðherraembætti.  Ætli Samfylkingin finni nokkurn sem vill taka við?

Fimmti ráðherrann sem segir af sér

Stjórnarskiptin.

  Það er alveg víst að stjórnarskipti muni breyta litlu, nema ef menn ákveði að fara aðrar leiðir en samþykkt hefur verið að fara í dag þ.e. þá leið sem IMF hefur skipað okkur að fara.  Þá lendum við í nokkurskonar (NO WAY OUT) stöðu.  Ef við hefðum ákveðið strax að hafna IMF þá hefðu málin litið kannski öðruvísi út, það má allavega ætla að svo hefði verið.  En trúverðugleiki þjóðarinnar gagnvart alþjóðasamfélaginu minnkaði stórlega ef við færum að snúa blaðinu við á miðri leið.  Það er jú þannig að sumir stjórnmálaflokkar eins og VG. vilja hafna allri hjálp að utan ef þeir komist til valda, það er þó nokkur möguleiki á því á meðan ólga er ríkjandi hjá almenningi gagnvart ríkjandi stjórnvöldum.  Það er vonandi svo að sú stjórn sem nú er fái frið, nú þegar búið er að ákveða kosningar í vor og fólk geti farið að láta sig "dreyma" um betra þjóðfélag eftir kosningar, því kannski verður það draumurinn einn sem fólk situr eftir með að loknum kosningum.

Stjórnarskipti breyta engu

RÚV sleppir af sér beislinu!

  Það eru breyttir tímar í Íslensku þjóðfélagi.  Loksins er tími rótleysingja og stjórnleysingja runninn upp.  Aldrei áður hafa hópar einstaklinga sem ekki virðast eiga sér fulltrúa á þingi haft eins mikil völd og nú er orðin raunin.  Einstaklingar og hópar ungs fólks hafa fengið "frelsi"  til að hella úr skálum reiði sinnar og fengið óáreittir að beina þeirri reiði gegn lögreglu og löggjafastofnunum landsins.  Með dyggum stuðningi Ríkisfjölmiðla, sérstaklega Ríkisútvarpinu hafa ákveðnir hópar fengið fríar umfjallanir og lýst hefur verið beint reglulega af fundum þessara hópa.  Nú vitum við að máttur fjölmiðla er mikill, en svo virðist sem Ríkismiðlarnir hafi sérstaklega tekið upp málstað þessa fólks.  Ekki bólar mikið á umfjöllun um lausnir á vandanum, heldur er hamrað endalaust á því að allt sé komið í þrot í þjóðfélaginu, þar er eingöngu leitað að sökudólgum og nóg er um sérfræðinga hjá RÚV til að leita til í þeim efnum.  Ansi lítið er um uppbyggilega umræðu í þessum miðli landsmanna.  Lausnarorðið hjá þessum opinbera miðli er "kreppa".  Á þessum miðli landsmanna eru menn greinilega komnir í stríðsham gegn ríkjandi stjórn.  Allt hlutleysi er fokið út í veður og vind á þessum miðli!  Eiginlega á maður erfitt með að sjá muninn á RÚV og Útvarpi SÖGU, efnistökin eru allavega svipuð.

Ekki neitt nýtt af nálinni.

  Það er alvanalegt að fólk flytjist á milli í atvinnuleit, þannig er það alltaf þegar þrengir að.  Þess vegna er bráðnauðsynlegt að menn nái að vinna í málunum til að leysa vandann hér á landi sem fyrst.  En vandinn er sá sami annarstaðar á vesturlöndum.  Það er brýnt að fyrirtæki og einstaklingar sjái fram á vaxtalækkanir sem fyrst hvað sem líður kröfum alþjóðagjaldeyrissjóðsins í þeim efnum.  Stýrivextir hljóta að fara lækkandi nú á næstunni, enda viðskiptajöfnuður orðinn mjög hagstæður nú þegar og útlit fyrir að svo verði áfram næstu mánuði og jafnvel misseri.  Vonandi að þessar pólitísku þrengingar skemmi ekki fyrir því að við höldum haus í þeirri vinnu sem framundan er.

Tvö til þrjú þúsund flytja út

Framsókn grípur tækifærið!

  Þá er framsókn komin í slaginn og býður fram minnihlutastuðning.  Formaðurinn sér þarna tækifæri á að auglýsa sig fyrir næstu kosningar, hvenær sem þær verða.  Spurning hvort þetta útspil frammara nægi til að styrkja flokkinn til framtíðar?  Spurning hvað hinum reyndari þingmönnum framsóknar finnist um þetta uppátæki sem hlýtur að vera sett fram af hinni nýju forystu flokksins.

Vill verja minnihlutastjórn falli

Alltaf fjör í miðbænum.

  Það ríkir carnival stemming í miðbænum þessa stundina.  Kveikt er á báli og Oslóartréið brennt,  sem er svo sem hið besta mál, þá þarf ekki að flytja það til förgunar.  Greinilegt að brennan er í boði lögreglu og slökkviliðs borgarinnar, enda gerir hún lítið til að blanda sér í stuðið sem þarna er. 

Jólatréð brennt á bálinu

Nýr forseti Bandaríkjanna.

  Þá er Barack Obama tekinn við sem forseti Bandaríkjanna.  Hann tekur við á erfiðum tímum í Efnahagsmálum heimsins.  Forsetinn fer með yfir 80% stuðning þjóðarinnar við upphaf valdatíðar sinnar samkvæmt könnunum.  Þetta er þó ekki einstakt í sögunni því minna má á að Ronald Reagan hafði svipaðan stuðning þegar hann tók við embætti á sínum tíma!  Reagan tókst að standa undir væntingum á sínum tíma og vonandi verður það sama uppi á teningnum hvað Obama varðar, fólk trúir því að betri tímar séu framundan og því verður athyglisvert að fylgjast með hvernig hinum unga forseta tekst til í embætti.  Nú þegar Bush hverfur úr embætti, þá verður athyglisvert að fylgjast með hvernig sagan mun dæma hann þegar fram líða stundir!  Ég hef nokkra trú á því að hans verði minnst sem þess manns sem braut upp herör gegn hryðjuverkum í heiminum m.a. og sýndi að ekki væri hægt að ráðast gegn lýðræði í heiminum með skæruhernaði eða öðrum hermdarverkum, eða hvaða nöfnum sem þau nefndust.  Allavega er búið að tryggja að ekki verður ráðist gegn Bandaríkjunum með þeim hætti sem þekkist í öðrum heimsálfum, það er eitt sem búið er að tryggja!

Obama: „Við erum reiðubúin að leiða á ný“