Fullkomnlega hárrétt ákvörðun hjá Einari kr. Guðfinnssyni.

   Og Einar Kr. hefur rökin sín megin í þessum málum.  Hvalveiðar og Hvalaskoðun geta að sjálfsögðu farið vel saman enda þessir hlutir gengið vonum framar síðustu sumur!  Merkilegt er þó þegar Formenn starfsgreinasambanda taka sig saman og álykta gegn þessum aðgerðum sem eiga að vera í þágu þjóðarinnar allrar.  Þarna taka formennirnir þrönga hagsmuni fram yfir hagsmuni heildarinnar.

Gagnrýna ákvörðun Einars Kr.

Wall Street Journal.

   Hannes Hólmsteinn tjáir sig á vef Wall Street Journal.  Hann segir þar að láni frá IMF. hafi verið þröngvað upp á okkur af kröfu IMF og Evrópusambandsins, eftir að bankarnir hrundu hér í Október,  til að við gætum uppfyllt greiðslukröfur frá erlendum innlánseigendum og þannig steypt Íslenskum borgurum í stórskuldir.  Í rauninni er Hannes bara að lýsa þróun mála hér á landi  fyrir erlendum lesendum blaðsins.  Það er nú ekki svo slæmt að einvher taki að sér að útskýra málin fyrir umheiminum, okkur veitir nú ekki af að reyna rétta stöðu okkar á alþjóðavísu og koma hlutunum rétt til skila hvað varðar útskýringar á hruninu mikla sem hér varð.  Ekki laust við að maður sjái léttan húmor að hætti Hannesar bregða við í þessari grein!

Hannes Hólmsteinn: Óvinir Davíðs

Jóhanna segir "skák".

   Nú er boltinn hjá Seðlabankastjórum.   Spurning hvaða varnarleik bankastjórar leika, segja þeir skák  líka eða gefa þeir leikinn?  Það virðist þó verða erfitt fyrir Jóhönnu að segja skák og mát, því það mun án efa verða kostnaðarsamt fyrir frúna í forsætisráðuneytinu.  En ekki verður það nú svo sem áhyggjuefni forsætisráðherrans enda alvön því að fórna miklum fjármunum úr Ríkiskassanum og fer létt með.

Seðlabankastjórar víki

Nú skal tekið til hendinni...

   Nú rignir inn ábendingum, kærum og fyrirspurnum til þessa nýja saksóknara sem á að rannsaka hvað varð af öllum aurum landsmanna.  Eins gott að hinn nýja rannsóknarstofnum standi nú undir nafni og verði eitthvað ágengt í þessum efnum, því allt hefur "klikkað" hingað til.   Við vonum að "inspector clouso" og hans menn nái skjótum og góðum árangri í að fletta ofan af öllu útrásargenginu og endurheimta eitthvað af því "góssi " sem horfið hefur úr innviðum banka og fyrirtækja á undanförnum misserum.  Og í kjölfarið munu síðan sökudólgarnir fá sín maklegu málagjöld í hinu illræmda íslenska dómskerfi í kjölfarið...

Bankahrunsmál til sérstaks saksóknara

Nýr Ráðherra Bankamála.

   Þá er hin nýja byltingarstjórn búin að ákveða með Ráðherraembætti sín.  Enginn fannst innan flokkanna til að fara með mál bankanna og fjármálaeftirlitsins.  Leita þurfti til Háskóla íslands til að fylla upp í Ráðherrakvótann.  Mun hin nýja stjórn leita eftir "akademískum" lausnum á þeim vanda sem að þjóðinni steðjar.  Líklega verður hinum nýja Viðskiptaráðherra gert að gera hinum sitjandi bankastjórum í Seðlabankanum eins lífið leitt og hægt er, og kannski með aðstoð hins nýja Dómsmálaráðherra sér til halds og trausts!  Samfylking og VG. munu samkv. frétt stöðvar 2. ætla að kynna hina nýju stjórn á Austurvelli þar sem byltingarsinnar stóðu áður og ausuðu svívirðingum yfir landsfeðurna.  Nú mun Samfylkingin standa þar og taka við heillaóskum frá hinum sömu aðilum...

Gylfi tók ráðherraboði

Þá er það á hreinu.

  Það er ljóst að stýrivextir verða áfram óbreyttir, öllum til mikillar gleði.  Áfram er haldið með að uppfylla óskir IMF.  Auðvitað hefðu allir viljað sjá lækkun stýrivaxta, en fyrst farið var í það að fylgja IMF í einu og öllu þá verðum við bara að vona að útkoman að lokum verði okkur hagstæð.  Nú er spurningin  hvort þetta sé síðasta ákvörðun núverandi banakstjóra eða hvort hin nýja Ríkisstjórn láti af því að koma honum Davíð og félögum úr bankanum.

Óbreyttir stýrivextir

Er toppinum náð?

  Nú er spurningin hvort að toppi sé náð í hækkanaferlinu almennt?  Verðbólgan er komin í yfir 18%.  Athyglisvert er hve mikið grænmeti hefur hækkað, en gengið hefur haft mikil áhrif á verð innfluttra vara síðustu mánuði.  Nú verður við að bíða og sjá hvort verðbólga fari lækkandi næstu mánuðina eins og menn gera ráð fyrir eða hvort hún heldur áfram upp á við, þetta verður nú í höndum nýrrar Ríkisstjórnar að stýra þessu í "rétta átt".  Óttast margir að verðbólgan geti haldið áfram að magnast ef ný stjórn tekur ekki málin "föstum" tökum, tíminn er stuttur og málið þolir enga bið, en maður óttast óneitanlega hið versta næstu mánuði.

 

Verðbólgan 18,6%

Forsetinn.

   Hvernig er það, nú þegar mótmælendur á Austurvelli eru loksins búnir að hræða líftóruna úr Samfylkingunni, er þá ekki tími kominn á Forsetann og krefjast afsagnar hans?  Hann var jú einn þeirra sem hrósaði útrásinni í hástert á sínum tíma og ber ekki minni ábyrgð en aðrir á öllu saman, hann hvatti útrásarvíkingana í hvívetna og var fyrsti maður að mæta á samkomur þeim til heiðurs.  Ætla hinir vösku félagar úr Harðarvinafélaginu ekki að mæta á Bessastaði og berja bumbur... maður spyr nú bara?

Björn: Forsetinn gekk á svig við hlutleysi sitt

Samfylkingin uppfyllir óskir mótmælenda.

  Hverjir fara með völdin?  Jú svo virðist sem völdin séu í höndum nokkurra þúsunda einstaklinga sem mæta á Austurvöll helgi eftir helgi til að krefjast afsagnar Ríkisstjórnar, og svo virðist sem Samfylking ætli að uppfylla óskir þessa fólks.  Svo virðist sem restin af þjóðinni muni ekkert fá að segja um málið. Restin af þjóðinni fylgist bara með, hinn þögli meirihluti þjóðar fær ekkert um þetta að segja?  Greinilega er hart barist um atkvæðin á vinstri væng stjórnmálanna.  Það hefur verið um það rætt að ef félög eins og Heimdallur Sjálfstæðisflokksins væri með samkomur af þessu tagi þar sem meðlimir eru um 5000. þá væri líklega umfjöllunin með öðrum hætti.  Líklega myndi Ríkisútvarpið allavega ekki vera á staðnum helgi eftir helgi til að flytja fréttir af málum.  Ef svo fer fram sem horfir, þá þurfum við varla að mæta á kjörstaði í framtíðinni, því ákvarðanir verða alla teknar á Austurvelli og af þeim sem láta mest í sér heyra og eiga stærstu pottana til að berja í. 

Upphaf á kosningabaráttunni

Erfiðir tímar framundan.

  Ljost er að erfiðir tímar eru framundan.  Forsætisráðherra talar um að ekkert megi fara úrskeiðis og halda þurfi dampi.  Það er jú erfitt að spá hvað skeður á næstunni, allir virðast vera fara yfirum sem eitthvað tjá sig um stjórnmál þessa dagana.  Og kannski er það vandinn sem framundan er, þ.e. menn rjúka til og koma fram með skyndilausnir sem kannski geta gert illt verra þegar til lengri tíma er litið.  Athyglisvert að heyra í öllum stjórnmálafræðingunum sem nú hoppa fram enn eina ferðina og skýra ástandið frá sínum sjónarhóli, almennt telja þeir að stjórninni sé vart hugað líf og segja í raun að hún sé dauðadæmd.  Heldur finnst manni sem þessir fræðingar tali út í vindinn þessa dagana, en reyndar verður að segja það þeim til varnar, að þeir lifa jú á því að tjá sig um þessi mál almennt, þótt þeir tali nú ætíð á neikvæðu nótunum oftast nær.

Geir: Má ekki missa dampinn